Në 10-vjetorin e anëtarësimit të Shqipërisë në NATO, kryeministri Edi Rama e ka quajtur një domosdoshmëri edhe anëtarësimin e Kosovës.
Gjatë fjalës së tij, Rama tha se hyrja e Kosovës në NATO nuk është me rëndësi vetëm për shtetin e Kosovës, por në tërësi është me rëndësi për sigurinë e Ballkanit.
Kryeministri tha se dita e sotme është e veçantë, pasi është një moment krenarie, por edhe reflektimi.
Fjala e Ramës:
Ballkani gëzon sot një periudhë paqeje dhe përpjekje të ndërsjelltë. Sot ne s’jemi më armiqtë e njëri-tjetrit, por jemi miq kundër armiqve të tjerë. Ekstremizmi i shtetit islamik s’mund të shfaroset vetëm me forcën e armëve, por me forcën e mendjes. Kriza e refugjatëve sirianë, apo lufta kibernetike, janë rreziqe reale që kanë nevojë për një përgjigje të përbashkët ku secili ka vendin dhe rolin e vet. NATO duhet të përballet edhe me doktrina ofensive dhe një shpërfillje të hapur të ligjeve ndërkombëtare. Aneksimi i Krimesë është vetëm një nga dëshmitë aktuale të kësaj dukurie. Ne ndihemi jashtëzakonisht mirë sot që integrimi i Malit të Zi dhe Maqedonisë në NATO ka krijuar nja hapësirë të gjerë në Ballkan për Nato dhe ka çuar në mbushjen e një vakumi të krijuar pas ndryshimeve tektonike. Ballkani të mos jetë kurrë më porta ku influenca të vendeve të treta, arrijnë të depërtojnë, është e rëndësishme që edhe Kosova të bëhet pjesë e integruar e Aleancës euroatlantike. Shqipëria beson se anëtarësimi i saj është i domosdoshëm për të gjithë familjen euroatlantike. 10-vjetori i anëtarësimi i Shqipërisë në NATO është momenti krenarie, por edhe reflektimi për çka duhet të bëjë më tutje. Forcat tona të armatosura janë sot shumë më të paguara, garanci e sigurisë të Shqipërisë në NATO. Por duhet të jenë edhe më të mirëpajisura, e të mirëpaguara./ Tirana Today
