Sot, në fjalën e marrë në Kuvend, Ministrja e Shëndetësisë Ogerta Manastirliu iu rikujtoi qytetarëve se virusi është mes nesh, e ndërsa nuk ka asnjë rast me variantin Delta. Në të njëjtën linjë ka qëndruar edhe zv.ministrja e Shëndetësisë, Mira Rakacolli, e cila nuk ndalet me apelet ndaj qytetarëve që të jenë të ndërgjegjshëm. Në një intervistë për “Report Tv”, Rakacolli tha se në ndryshim me variantet e tjera, është me infeksioz. Dhe se lajmi i mirë është që vaksinat mund ta parandalojnë infektimin zinxhir.
“Varianti Delta është e mundur që të identifikohet nga ISHP, por përderisa është fillimi, na duhet të jemi të sigurtë dhe na duhet edhe nga laboratorët jashtë, deri tani nuk kemi të dyshuar për variantin Delta. Ndryshimi me variantet e tjera është me infeksioz. Lajm i mirë është që vaksinat mund ta parandalojnë. Njerëzit duhet të vazhdojnë që të kenë në vëmendje vaksinimin, pasi është e vetmja mënyrë për të ndaluar përhapjen e virusit”, u shpreh zv.ministrja.
Rakacolli, duke iu përgjigjur kërkesës së bizneseve për zgjatjen e fashës orare për muzikën, deklaroi se jemi një moment alerti sa i përket virusit Delta. “Ne jemi në alert për Deltan dhe nuk mund të mendojmë për një shtim të orarit të muzikës për momentin. Nëse situata do të jetë e qëndrueshme, çdo gjë mund të rivlerësohet. Masat ne nuk i kemi marrë kot”, tha Rakacolli.
