Gjatë paradites së sotme, kryeministri Rama ka mbledhur koordinatorët e platformës ‘Shqipëriaqëduam.al’, ku ka treguar disa nga problemet e zgjidhura në javët e fundit.
Teksa po prezantonte një rast, një grua që kishte zgjidhur problemin e saj pas ankesës në platformë, i ka shprehur haptazi vlerësimet Ramës.
Ajo tha para të pranishmëve se e donte kryeministrin Rama si djalin e saj, dhe kishte shumë emocione teksa po fliste para tij. Nga ana tjetër, Rama ia ka kthyer përmes batutave pikante.
REPLIKAT
Gruaja: Të dua si djalin tim, kam shumë emocione
Rama: Në fakt nuk ke faj, sesa ke dëgjuar për mua shumë qëndrove.
Gruaja: Kam dal dhe njëherë në foto me ty unë.
Kryeministri Rama e ka cilësuar si një histori suksesi ndërveprimin e qytetarëve me qeverinë, përmes platformës online “Bashkëqeverisja”. Ai tha se duke iu drejtuar platformës, të gjithë qytetarët i heqin pengesat dhe kanë një mik shumë të fortë që është drejtpërdrejt në qeveri.
Teksa u prezantuan disa raste për problemet me pensionet, Rama tha se pensionistët nuk kanë pse të përdorin miqtë e tjerë, pasi sipas tij, i vetmi mik është platforma.
“Nuk është ende një strukturë që reagon dhe përgjigjet në kohë reale në të gjithë territorin e vendit. Në shumë vende, pensionistët nuk e marrin përgjigjen dhe përkushtimin që meritojnë.
Mirëpo duke ju drejtuar platformës, ata i heqin këto pengesa dhe kanë një mik shumë të fortë që është drejtpërdrejt në qeveri. Thirrja ime për gjithë pensionistët që kanë probleme me pensionin është mos prisje zgjidhjen në zyra, në rast se nuk ju vjen menjëherë, por direkt tek ‘Shqipëria që duam.al’, ku janë zgjidhur të gjitha rastet”, tha Rama.
