Një përplasje me armë ndodhur mbrëmjen e 4 tetorit, solli vdekjen e shtetasit Fabjol Gaxha dhe u plagosën Ervis Martinaj dhe Eljon Hato. Ngjarja ndodhi në zonën e ish-Bllokut, në rrugën “Ibrahim Rugova”. Sipas deklaratës së policisë, pista kryesore është ngacmimi i këngëtares Elvana Gjata.
Por, përsëri uniformat blu po hetojnë edhe pista të tjera, të cilat lidhen me borxhe apo pagesa të pakryera. Ndërkohë vazhdojnë kontrollet në terren për kapjen e tre personave të shpallur në kërkim për përplasjen me armë.
Teksa policia zbulon detaje të tjera nga ngjarja e ndodhur në zonën më të frekuentuar të kryeqytetit, gjendja duket se është kthyer në normalitet.
Qytetarët të trembur
Lokali ku ndodhi ngjarja vazhdon të jetë i mbyllur, por punonjëset u shprehën për Tirana Today se do të rihapet së shpejti. Por, kalimtarët thonë se janë të frikësuar nga ngjarje të tilla.
“Ne e frekuentojmë shumë zonën e Bllokut dhe jemi me fat që nuk na ka ndodhur asgjë. Se kështu si është bërë, është shumë e rrezikshme. Madje edhe rruga ku kalojmë, është e rrezikshme.
Në Shqipëri personat me precedent penale lëvizin lirisht në publik, madje edhe të armatosur. Ku ke postbllok këtu, e marrin e fusin në makinë dhe askush nuk i ndalon apo kontrollojë. Që ka banda ajo është e sigurt, kanë shumë lekë dhe lëvizin me armë gjithmonë. Konfliktet e tyre kështu i zgjidhin.”
“Të gjitha zonat njësoj janë, shumë të rrezikshme. Persona të cilët janë me precedent penale duhet të jenë gjithmonë në vëzhgim nga policia.”
Qytetarët shprehen për Tirana Today se policia toleron personat të cilat janë të lidhur me krimin, duke i bërë të ndjehen edhe më të pasigurt.
“Po të ndodhesha në një mjedis ku do të kishte shkëmbim zjarri, sigurisht që do të frikësohesha shumë. Por, këtu është qelbur peshku nga koka.”
“Këtu mund të ndodhë në çdo moment një e papritur. Dhe kjo e papritura sigurisht që na ka frikësuar. Nuk pimë dot një kafe dhe nuk dihen nga na vjen plumbi. Të rrijë gjithë kjo polici në Bllok dhe të merret vetëm me gjoba?! Vjen polici, sheh çfarë makine ke dhe më pas shkon e pi kafe. Të ndodhë ngjarja në Bllok, sidomos që vijnë njerëz të inkriminuar dhe policia të mos e dijë?! Kjo është më e tmerrshme,” shprehen qytetarët. TIRANA TODAY
