Policia e Kosovës ka dhënë detajet e operacionit anti-kontrabandë, ku janë arrestuar tetë shtetas, shqiptarë e serbë. Bëhet fjalë për operacionin policor në rajonin e Prishtinës, Pejës, Mitrovicës së Jugut dhe Mitrovicës së Veriut, për parandalimin e veprave penale. Më konkretisht, luftën e pa kompromis ndaj kontrabandës së mallrave.
“Referuar situatës së krijuar, rrezikimit të drejtpërdrejt të zyrtarëve, bllokimeve të rrugëve, përdorimit të bombolave të gazit, shok bombave, përdorimit të armëve të zjarrit e granatave të dorës nga persona të dyshuar si dhe dëmtimit/zjarrvënies së automjeteve zyrtare, Policia e Kosovës është detyruar të ndërmarrë veprime policore duke përdorur mjetet e nevojshme ligjore, me qëllim të ofrimit të sigurisë ndaj zyrtarëve të përfshirë në operacion, qytetarëve në atë zonë dhe krijimit të mundësisë së lëvizjes e qarkullimit të lirë”.
Më tej, në njoftimin zyrtar citohet se si pasojë e goditjeve me mjete të ndryshme vdekjeprurëse drejt zyrtarëve policorë, deri më tani janë raportuar gjashtë zyrtarë policorë që kanë pësuar lëndime trupore. Prej tyre, pesë zyrtarë të nacionalitetit shqiptar dhe një i nacionalitetit serb.
Policia ka njoftuar se deri në këtë fazë janë arrestuar dhe shoqëruar tetë persona:
R. K. (1957) mashkull kosovar/shqiptarë nga rajoni i Pejës
A. K. (1979) mashkull kosovar/shqiptarë nga rajoni i Prishtinës
M.N. (1990) mashkull kosovar/shqiptarë nga rajoni i Mitrovicë Jugu
I.Z. (1982) mashkull kosovar/shqiptarë nga rajoni i Mitrovicë Jugu
A.D. (1995) mashkull kosovar/shqiptarë nga rajoni i Mitrovicë Jugu
M. Dz.(1958) mashkull kosovar/boshnjak nga rajoni i Mitrovicës Veri
I. H. (1975) mashkull kosovar/shqiptarë nga rajoni i Mitrovicës Veri
M. L. (1978) mashkull kosovar/serb nga rajoni i Mitrovicës Veri”.
Gjithashtu bëhet e ditur se në operacionin e sotëm janë sekuestruar mallra, në vlerë prej qindra mijëra euro. “Operacioni policor ka përfunduar, situata në pjesën veriore të Mitrovicës është qetësuar, përderisa veprimet e mëtejme policore janë duke u realizuar në bashkëpunim dhe koordinim me Doganën e Kosovës dhe organet e drejtësisë”, thuhet në njoftimin e policisë.
