Projekti i ashtuquajtur “By Pass-i i Gjirokastrës” që synonte të lehtësonte qarkullimin e automjeteve në zonën historike dhe kthimin e zonës së Pazarit në pedonale, ka hasur në reagimin e banorëve të këtij qyteti.
Sipas tyre, ky projekt ishte një nga ndërhyrjet më të dhunshme, që mund t’i bëhej qytetit, në zonën e mbrojtur historike.
Projekti ishte një segment rruge që niste nga sheshi i ish-agjencisë së udhëtarëve dhe përfundonte në Ndënkala. Ai nuk u pranua nga banorët e lagjes Pazari i Vjetër, pasi rrezikonte të shembte banesat 300-vjeçare.
Kundërshtimi nisi fillimisht nga 2-3 familje të lagjes “Pazari i Vjetër”, që prekeshin nga ndërtimi i kësaj rruge në zemër të qytetit muze. Me anë të një letre, ata iu drejtuan fillimisht këshillit bashkiak, ditën që ky duhet të miratonte fillimin e punimeve. Këshilli bashkiak dhe kryetarja e bashkisë, Zamira Rami, duke vlerësuar shqetësimin qytetar, i kërkuan zyrtarisht Institutit të Monumenteve të Kulturës të rishikonte edhe një herë projektin për disa elementë që ishin të dyshimtë dhe me risk për të ardhmen e zonës së kështjellës.
Komuniteti i qytetarëve gjirokastritë, të përkrahur dhe mbështetur nga Forumi i Mbrojtjes se Vlerave të Gjirokastrës arritën të fitojnë gjyqin dhe të pezullohen procedurat e ndërtimit të rrugës që rrezikonte seriozisht vlerat monumentale mu në zemër të qytetit muze.
Ministria e Kulturës pranoi ndryshimin e projektit. Sipas saj, projekti i ri do të shmangë kalimin e rrugës nga lagjja Pazari i Vjetër, duke kërkuar mënyra të tjera alternative. Ndërkohë, ky ndryshim i projektit konfirmohet edhe nga kryetarja e Bashkisë, Zamira Rami. Sipas saj, “bypass-i nuk do të ndërtohet në lagjen Pazari i Vjetër, por po studiohet mundësia për zbatimin e një tjetër projekti.”
Engjëll Serjani
