Qendra ALERT, një Organizatë Jofitimprurëse që ka në fokus kryesor të saj mbrojtjen dhe ndërgjegjësimin e konsumatorit, ka zbuluar se akulloret janë të ngarkuara me koloni bakteresh sistaphyloccocus coagulase dhe entorebakteret, 10 herë më të larta mbi normat e lejuara.
Infeksionisti Pëllumb Pipero tha se gjatë përgatitjes së akullores, qumështi pluhur, por edhe ai lëngshëm shtohet me ujë të ndotur. “Prezenca e këtyre baktereve në akullore dëshmon që produktet më të cilat prodhohen ato, vëçojmë këtu qumështin, janë të ndotura. Staphyloccocus coagulase dhe entorebakteret kryesisht trasmetohen përmes ndotjes së ushqimeve, duart e papastra, përzierja e qumështit me ujë i cili është i ndotur. Janë mikroorganizma që trasmetohen kryesisht në rrugë fekal-orale”, bëri me dije Pipero.
Pas publikimit të investigimit, i cili pretendonte për një cilësi të keqe të akulloreve që shiten në pika të ndryshme në Tiranë, Autoriteti Kombëtar i Ushqimit ka kryer 156 kontrolle.
Deri më tani, mësohet se AKU ka vendosur 28 gjoba paralajmëruese për subjekte të ndryshme, dhe ka marrë mostra për të bërë analizën e cilësisë.
Prodhimi vendas i akullores po njeh një zgjerim të vazhdueshëm në vitet e fundit. Aktorët kryesorë të tregut tregojnë se së fundmi, shitjet për produktin e akullores nuk janë thjesht sezonale, por prodhohen gjatë gjithë vitit.
Në dimër ka një rënie të lehtë të prodhimit, duke qenë se dhe pastiçeritë fokusohen në prodhimin e ëmbëlsirave. Rritja e prodhimit vendas dhe tendenca për të kërkuar produkte të freskëta, të cilat nuk kanë qëndruar gjatë të ngrira në frigorifer, reflektohet edhe nga të dhënat e doganës mbi importet e akulloreve.
