Të paktën 300 breshka deti kanë ngordhur në bregun e Paqësorit të Meksikës. Të dhënat paraprake thonë se breshkat janë mbytur, tha një zyrtar i Ministrisë së Mjedisit të Meksikës.
Zyrtari tha se ato ndoshta ishin ngatërruar në rrjetat e paligjshme të peshkimit në det të hapur, ose në rrjeta të braktisura të njohura si “rrjeta fantazmë”.
Breshkat janë renditur si të pambrojtura nga Bashkimi Ndërkombëtar për Ruajtjen e Natyrës (IUCN).
Breshkat u gjetën në plazhin Morro Ayuta në Oaxaca, në bregun perëndimor të Meksikës. Plazhi është një nga vendet ku breshkat e ujit vijnë për të hedhur vezët e tyre.
Të gjitha kafshët e ngordhura ishin femra, tha eksperti i breshkave Ernesto Albavera Padilla për mediat lokale.
Nuk është hera e parë që një numër i madh breshkash uji janë gjetur të ngordhura në Oaxaca. Në vitin 2018, peshkatarët gjetën 300 prej tyre të ngatërruar në rrjetat e peshkimit.
Meksika e ndaloi kapjen e breshkave të detit në vitin 1990, dhe ka dënime të ashpra për këdo që i vret ato.
Zyrtarët thanë se marina e Meksikës, do t’i bashkohej autoriteteve mjedisore në hetimin për ngordhjen e tyre.
Burimi i lajmit: BBC. Përshtatur nga Tirana Today
