Studentët nga të gjitha rrethet i janë bashkuar sot protestës së studentëve në Tiranë, protestë që ka një javë që ka nisur. Nga bashkimi masiv i tyre, nuk kishte si të ndodhte ndryshe edhe bllokimi i rrugëve.
Është evidentuar pak çaste me parë bllokimi i akseve kryesore të Tiranës, nga ana e studentëve të Fakulteteve të Tiranës, ndërkohë që pritet që të mbërrijnë pas pak minutash dhe studentët e Universiteteve në rrethe.
Studentët e Shkencave Sociale dhe Juridikut kanë bllokuar kryqëzimin e 21 Dhjetorit, ndërsa te ish-sheshi Shqiponja, bllokimi po kryhet nga studentët e Universitetit Bujqësor të Tiranës.
Nga ana tjetër, studentët e Mjekësisë do të bllokojnë Rrugën e Dibrës, ndërsa në ambientet e Korpusit të Tiranës ka një prani dhe më të shtuar protestuesish.
Atyre u janë bashkuar dhe gjimnazistët e Tiranës, të cilët po ashtu kanë bojkotuar mësimin.
Ora 16:00 e ditës së sotme është afati i fundit që studentët i kanë vënë qeverisë, për plotësimin e 8 kërkesave të tyre.
