Kryeministri Rama, teksa ka shpërndarë pamje nga Llogaraja, uron një fundjavë të mbarë për të gjithë ata që do zgjedhin jugun si destinacion të tyre. Kreu i qeverisë ka hedhur ‘shashkën’ e radhës ndaj të gjithë të apasionuarve pas muzikës në orët e vona të mbrëmjes, duke uruar një fundjavë të mbarë me muzikën e natyrës.
“MIRËMËNGJES
dhe me këto pamje nga Llogaraja që të kujtojnë çfarë magjish ruan ky vend, Shqipëria, me malin dhe detin aty pranë, diellin dhe flladin, ju uroj një të premte të mbarë para një fundjave mbrëmjesh me muzikën e natyrës në bregdet”, shkruan Rama.
Qeveria nëpërmjet një akti normativ për parandalimin e përhapjes së Covid-19, ka vendosur mbylljen e lokaleve dhe klubeve të natës pas orës 20:00.
Qeveria vendosi të mbyllë klubet e natës, diskotekat dhe ‘lounge-bar’-et duke paralajmëruar gjobitjen për cilindo sipërmarrës që nuk zbaton këtë vendim. Po kështu është vendosur të ndalohet muzika për çfarëdolloj aktiviteti pas orës 20:00, që nëse shkelet do të gjobitet.
Masat i njoftoi Ministrja e Shëndetësisë, Ogerta Manastirliu, në një konferencë për shtyp. Ajo arsyetoi se vendimi është marrë “përballë një indiference të theksuar të të rinjve që frekuentojnë në orët e vona lokalet me muzikë të njohura si lounge bare”.
