Përfundon takimi i grupeve të punës për krijimin e qeverisë së re të Kosovës, LDK dhe Vetëvendosje. Takimi u mbajt në selinë e Lëvizjes Vetëvendosje.
Sakaq, përfaqësuesi i LDK-së, Arben Gashi u shpreh se temat për të cilat diskutuan kanë të bëjnë me sigurinë e brendshme dhe të jashtme të Kosovës.
“Temat që u diskutuan në këtë takim kanë të bëjnë me sigurinë e jashtme, me ushtrinë e Kosovës. Ngritja e kapaciteteve të ushtrisë së Kosovës dhe përgatitja e saj në afatin optimal për t’u anëtarësuar në NATO.
Siguria e brendshme që ka të bëjë me sigurinë në trafik, me sigurinë publike, me sigurinë e pronës, jetës dhe shëndetit të qytetarëve, sigurinë nga emergjenca civile. Diskutuam po ashtu dhe për sundimin e ligjit që ka të bëjë me gjykatat dhe prokuroritë”, pohoi Gashi.
Po ashtu, folën edhe për Vettingun, dekriminalizimin dhe për çështjen e krijimit të një zyre të veçantë që do të quhet Zyra Shtetërore e Hetimit.
“Për këtë zyre ende nuk kemi një qëndrim final. Kjo zyrë do të ketë disa komponentë siç janë: lufta kundër krimit të organizuar, hetimi i krimeve të vjetërsuara dhe sidomos krimeve politike, lufta kundër korrupsionit, dhe sundimi i ligjit në aspektin e antikorrupsionit dhe verifikimit të pasurisë së zyrtarëve të dyshuar.
Kjo zyrë ka nevojë ende për sqarime dhe për të parë a cenon sistemin kushtetues të Kosovës dhe a do të ketë ndryshime në ligje”, shtoi ai.
