Që në nisje të fillimit të punimeve të Kuvendit, qeveria ka tentuar kompromision dhe dialogun me opozitën. Menjëherë pas mbledhjes së Kryesisë së PS-së, kryetari i grupit parlamentar socialist, Taulant Balla, deklaroi se mazhoranca është e gatshme për dialog dhe komunikim me opozitën. Po kështu ai tha qartazi se lidhur me akuzat e ngritura ndaj tij dhe qeverisë, janë vetëm shpifje.
Lidhur me këtë, Balla tha se nuk mund të humbasë kohën me konferenca shpifjesh të PD, e ndërsa fokusi do të jetë tek njerëzit që i kanë votuar për të qeverisur vendin.
“Nuk mund të humbim kohë dita-ditës me tre konferenca për shtyp shpifjesh të PD, apo pjesëve të tjera të opozitës. Për ne gjithë vëmendja duhet të jetë tek njerëzit që na kanë votuar, dhe tek ata që na kanë dhënën nderin për të qeverisur vendin.
Por sigurisht, për PS dialogu dhe komunikimi me opozitën është thelbësore. Përveç shpifjeve për të cilat nuk mund të japim përgjigje, për çdo çështje tjetër dhe ka plot çështje të tjera për të cilat ne kemi të gjitha mundësitë të zhvillojmë një dialog konstruktiv, në dobi të integrimit evropian të vendit, në dobi të zhvillimit ekonomik dhe social të vendit”, tha ai.
Gazetarët e kanë pyetur po kështu në lidhje me ligjin për shkollën e Magjistraturës, për të cilën Balla foli për dialog konstruktiv. “Është një çështje që jemi të gatshëm në çdo moment të zhvillojmë dialog dhe gjetjen e një zgjidhje, e cila bën të mundur vijimin e një organizmi të rëndësishëm përgatitor për të furnizuar sistemin e drejtësisë me prurje të reja, që garantojnë cilësi dhe integritet publik të prokurorëve dhe gjyqtarëve të rinj. Jemi të gatshëm të dialogojmë konstruktivisht me përjashtim të shpifjeve që nuk kemi çfarë tu bëjmë”.
