Partia e Konservatorëve dhe Reformistëve Europianë – ECR, ka reaguar lidhur me votimin e ndryshimeve kushtetuese, të cilat i cilëson në kundërshtim me orientimin europian të Shqipërisë. Sipas ECR, këto ndryshime bien ndesh me rekomandimet e OSBE-së dhe janë të papajtueshme me standartet e NATO-s dhe Bashkimit Europian.
Në njoftim thuhet se veprimi i njëanshëm i qeverisë Rama për të ndryshuar Kushtetutën, shkon kundër orientimit europian të Shqipërisë. Partia e Konservatorëve dhe Reformatorëve Europianë – ECR, apelon ndaj PS që ti qëndrojë marrëveshjes së 5 qershorit për Reformën Zgjedhore dhe kodifikimit të saj të miratuar në mënyrë konsensuale, që është tani ligj.
“Partia e Konservatorëve dhe Reformatorëve Europianë- ECR dënon me forcë thyerjen e qëllimshme nga kryeministri Rama të konsensusit që partitë politike në Shqipëri arritën në 5 qershor me mbështetjen e bashkësisë ndërkombëtare, për Reformën e Kodit Zgjedhor të Shqipërisë.
Veprimi i njëanshëm i qeverisë Rama për të ndryshuar Kushtetutën, duke ndryshuar rregullat elektorale vetëm disa muaj para zgjedhjeve të planifikuara, me qëllim për të ndaluar partitë e opozitës të krijojnë koalicione elektorale, shkon kundër orientimit europian të Shqipërisë.
Partia e Konservatorëve dhe Reformatorëve Europianë-ECR është shumë e shqetësuar me këtë praktikë, e cila është në kundërshtim të rekomandimeve të OSBE-së për zgjedhje të lira dhe të ndershme dhe që është i papajtueshëm me standartet dhe normat demokratike të NATO-s dhe vendeve anëtare të BE-së. Partia e Konservatorëve dhe Reformatorëve Europianë – ECR i bën thirrje partisë qeverisëse në Shqipërisë ti qëndrojë marrëveshjes së 5 qershorit për Reformën Zgjedhore dhe kodifikimit të saj të miratuar në mënyrë konsensuale, që është tani ligj”.
