Aldi Rama, autori 21-vjeçar i vrasjes së efektivit të Lezhës, Saimir Hoxha, ka ndërruar jetë mëngjesin e sotëm. I riu ishte i shtruar nga pasditja e djeshme në spitalin e Traumës, pasi u gjet nga forcat e policisë me plagë në kokë. Rama u nis drejt spitalit të Traumës në Tiranë, ku qëndroi në intubim, por nuk ia doli dot mbanë.
I ndjeri qëlloi veten me pistoletë në fyt, në lagunën e Kune-Vainit gjatë operacionit të RENEA-s për arrestimin e tij, pas vrasjes së efektivit të policisë.
Ngjarja e rëndë ndodhi mëngjesin e djeshëm (28 shtator) në zonën e Ishull Lezhë, ku Aldi Rama hapi zjarr ndaj efektivëve të policisë, e ku mbeti i vdekur në krye të detyrës nënkomisari Saimir Hoxha, babai i dy fëmijëve.
Aldi Rama, i rritur nga gjyshërit, pasi prindërit i kishte të divorcuar, ishte me precedentë të mëparshëm penalë. Në moshën 18-vjeçare kishte përfunduar në burg, pasi ishte akuzuar për vjedhje dhe posedim kanabisi, ndërkohë që ishte kallëzuar edhe nga e dashura e tij për dhunë fizike.
Edhe në vitin 2020 ai është ndaluar sërish për mbajtje pa leje e armëve të ftohta. Nënkomisari në Komisariatin e Policisë Lezhë, Saimir Hoxha, u ekzektua me plumb në zemër.
