Blutë e Tiranës kanë përcjellë të dhënat në lidhje me plagosjen e ndodhur një natë më parë. 31-vjeçari Leo Hera, ka thënë se është plagosur në zonën e Don Boskos, por nuk ka pranuar të flasë më tej për grupin hetimor, duke shtuar se nuk e njeh atë që ka shtënë mbi të.
I riu u paraqit tek spitali i Traumës me një plagë me armë zjarri në këmbë, dhe ka marrë ndihmën e nevojshme mjekësore. Ai është pyetur nga Policia e Tiranës, por nuk ka pranuar të bashkëpunojë.
“Me datë 02.11.2020, rreth orës 23:05, është njoftuar Salla Operative se në spital është paraqitur shtetasi L.H., 31 vjeç, i dëmtuar në këmbë, jashtë rrezikut për jetën.
31-vjeçari ka kallzuar se në rrugën “Don Bosko”, është plagosur me armë zjarri në këmbë nga një person ende i paidentifikuar.
Grupi hetimor vijon punën për sekuestrimin e çdo prove të mundshme, që do çojë në identifikimin dhe kapjen e autorit si dhe sqarimin e plotë të rrethanave të ngjarjes”.
