Kontrolli i Lartë i Shtetit ka zhvilluar një auditim në Inspektoratin e Mjedisit dhe të Pyjeve në Kukës, ku ka evidentuar raste të shumta të prerjes së paligjshme të lëndës drusore, si dhe prani të lartë të subjekteve pa leje mjedisore.
KLSH thotë në raport se të paktën në 16 raste për vitin 2015, janë konstatuara prerje të pa ligjshme të lëndës drusore, në vlerën prej 3,2 milionë lekësh. Ndërkaq, në fund të vitit 2016 u konstatuan 43 subjekte pa leje mjedisore.
Raporti thekson gjithashtu se për vitet 2015-2016, nuk janë arkëtuar në buxhetin e shtetit 27 gjoba në vlerën prej 4,9 milionë lekëve të cilat janë të kthyera në urdhër ekzekutimi dhe janë dërguar në një kompani përmbarimi.
Të ardhurat e munguara në arkën e shtetit për shkak të mospagimit të taksës mjedisore vlerësohen nga KLSH në masën e rreth 14 milionë lekëve.
