Miku i fëmijërisë së presidentit rus, Vladimir Putin dhe njëherësh njëri prej oligarkëve më të pasur rus, Arkady Rotenberg, ka thënë se ai është pronar i vilës luksoze në Detin e Zi, e cila, në një video të publikuar, është përshkruar si ‘pallati për Putinin’.
Rotenberg, i cili ka në bashkëpronësi me vëllanë e tij një kompani të ndërtimit dhe infrastrukturës, për pesë vjet është nën sanksionet e Perëndimit.
Këto pretendime se kjo pronë në Detin e Zi i përket atij, Rotenberg i bëri në kanalin Mash, në platformën Telegram, përpara se të konfirmohej për agjencinë e lajmeve Interfax.
“Tani nuk do të jetë më sekret, unë jam përfitues. Ekziston një kompleks i tillë, kishte shumë kreditorë dhe arrita të bëhem përfitues. Kjo është një dhuratë nga Perëndia. Ai është një vend i mrekullueshëm”, tha Rotenberg.
Rotenberg tha se dëshiron ta shndërrojë këtë pronë në një hotel sepse aty ka një numër të madh dhomash.