Numri i të infektuarve, dita-ditës po njeh rritje në vendin tonë. Pas daljes nga izolimi, Ministria e Shëndetësisë ka raportuar për një bum të numrit të pacientëve që aktualisht janë të infektuar. Edhe Bashkia e Tiranës është prekur nga COVID-19.
Burime për “Ora News” konfirmojnë disa raste pozitive me koronavirus në Bashkinë e Tiranës. Shumica e rasteve mësohet se janë në zyrën e Urbanistikës. Lidhur me këtë situatë, punonjësit e Bashkisë së Tiranës kanë marrë një email, ku urdhërohen të punojnë me orar të reduktuar ose të qëndrojnë në shtëpi.
Ndonëse Bashkia e Tiranës ka vendosur tunel dezinfektues, nuk ka dhënë asnjë efekt në radhët e punonjësve.
Edhe pse Ministria e Shëndetësisë ka kërkuar ruajtjen e distancës sociale, në zyrat e Bashkisë është përhapur koronavirusi.
Gjatë 24 orëve të fundit janë kryer 319 testime, për të dyshuar të prekur me COVID-19. Nga të cilat janë konfirmuar 69 raste pozitive, kryesisht në ndërmarrje dhe aktivitete biznesi, kontakte të rasteve te konfirmuara më herët pozitive, të identifikuara nga gjurmimi dhe hetimi epidemiologjik, si dhe raste te reja.
