Një video e hedhur në qarkullim nga “TV Alsat M”, tregon qartë përfshirjen e deputetëve të VMRO-DPMNE-së në ngjarjen e 27 Prillit në Kuvendin e Maqedonisë.
Madje në materialet e regjistruara nga kamerat e sigurisë, shihet qartë se portat kryesore të Kuvendit janë hapur nga deputetë të kësaj partie.
Në video vërehet qartë se, ndërkohë që protestuesit e dhunshëm godasin portat e Kuvendit të cilat ishin të bllokuara nga trarët mbajtës, është deputeti Kërrste Mukoski i cili vrapon dhe bashkë me një deputet tjetër të VMRO-DPMNE-së që dyshohet të jetë Sashe Vasilevski, heqin trarët dhe turma e dhunshme futet në Kuvend.
Vasilevski më pastaj shihet duke u përqafuar me protestuesit, ndërsa në mesin e tij është edhe Johan Tarçullovski. Pamjet hedhin dyshimet se deputetët kanë hapur dyert pasi policia të ketë siguruar portat.
Në aksionin e hapjes së dyerve dyshohet të kenë marrë pjesë edhe agjentë të Agjencisë së Inteligjencës, agjentë të DSK-së, shërbyes ushtarak, nëpunës të sigurimit në Kuvend dhe të tjerë, raporton Alsat M
