Kuvendi i Shqipërisë ka kursyer nga pagat e deputetëve rreth 14 milionë lekë gjatë bojkotit të opozitës në 4-mujorin e parë të 2017. Ndërkohë, kësaj shifre kursimi i shtohen dhe rreth 11 milionë lekë kontribut i sigurimeve shoqërore. Në raportin e monitorimit të buxhetit për vitin 2017, Kuvendi thekson se për 4-mujorin e parë ishte parashikuar një fond 116 milionë lekësh për paga, por është realizuar vetëm në shifrën prej 88 për qind.
Deputetët e Partisë Demokratike në 3 muaj bojkot nuk janë paguar për veprimtaritë parlamentare, si 2 mijë lekë për çdo pjesëmarrje në komision apo dhe pagesa shtesë të tjera, dhe as për ditët e punës. Kuvendi nuk ka kursyer vetëm në pagat e deputetëve, por edhe në shpenzimet e tjera, përfshirë ato administrative.
Për vitin 2017, janë planifikuar fonde për paga për një numër prej 405 personash, ku përfshihet stafi politik, përfshirë dhe stafin e zyrave zgjedhore në rrethe.
