Ministrja e Shëndetësisë, Ogerta Manastirliu ka publikuar hartën e përhapjes së Covid-19 në dy javët e fundit në vend.
Në hartë tregohen zonat e kuqe, ku virusi i rrezikshëm ka shënuar një përhapje të madhe.
Në këto zona rreziku bëjnë pjesë Fieri, Gjirokastra, Gramshi, Kavaja, Korça, Mallakastra, Mirdita, Përmeti, Puka, Saranda, Tepelena, Tirana dhe Tropoja.
Manastirliu iu bën thirrje qytetarëve të zbatojnë masat për të kontribuuar në kufizimin e përhapjes së virusit.
”Çdo qytetar mund të kontribuojë në kufizimin e përhapjes së COVID19. Është koha të bëhemi bashkë në këtë betejë për shëndetin derisa ta mundim të keqen dhe t’i rikthehemi normalitetit që secili prej nesh dëshiron.”, shkruan Manastirliu në rrjetin social, Facebook.
Për shkak të rritjes së rasteve me Covid-19, Komiteti Teknik i Ekspertëve mori sot këto vendime:
1. Kufizimi i lëvizjes nga ora 22:00 – 06:00 në të gjithë vendin, me përjashtim të lëvizjes për motive pune, emergjenca shëndetësore apo nevoja të domosdoshme.
2. Ndalohen aktivitetet e bareve – restoranteve nga ora 22:00 – 06:00 (përvec shërbimit delivery).
3. Smart-working për administratën publike (sipas specifikës së sektorit) në zbatim të protokolleve të sigurisë. Përjashtim bëjne strukurat ofruese të shërbimeve duke zbatuar protokollet e sigurisë.
Këto masa do të hyjnë në fuqi më 11 nëntor dhe do të zgjasin për 3 javë.
