Ish-truproja i Sali Berishës, Izet Haxhia, ka akuzuar muajt e fundit ish-eprorin e tij për organizimin e një atentati ndaj kryeministri Aleksandër Meksi 26 vite më parë. Ky i fundit po rikthehej në mbrëmje me avion nga Italia, kur dritat në pistën e Aeroportit të Rinasit fiken papritur.
Falë zotësisë së pilotit italian, të gjithë në bordin e avionit shpëtuan shëndoshë e mirë. Sipas Haxhisë, pas fitores së zgjedhjeve të 22 marsit dhe zgjedhjes së tij president, Berisha nuk donte që Meksi të merrte drejtimin e qeverisë së re demokrate. Armiqësia mes tyre kishte nisur që në dhjetorin e vitit 1991, kur Meksi u zgjodh për pak ditë kryetar i PD. Këtë ngjarje e konfirmoi vetë Aleksandër Meksi, që shtoi se nuk i dinte prapaskenat e saj. Ndërkohë ish- shefi i SHIK-ut në Pogradec e Kavajë, Andrea Dimushi, pretendon se ka ekzistuar një plan i dytë për eliminimin fizik të Meksit në vitin 1994. Sipas tij, Meksi përgjohej gjatë gjithë kohës nga Bashkim Gazidede. Dhe në një takim ky i fundit i tregoi 2 snajpera, me të cilat vëllezërit Ismal dhe Eqerem Kazazi do të kryenin atentatin ndaj Meksit. Pas këtij pohimi shokues 3 vite më parë, Dimushi është larguar nga Shqipëria, pasi mori kërcënime për jetën./TIRANA TODAY/
