Elvana Gjata është shpallur në kërkim policor, lidhur me ngjarjen në ish-Bllok. Në kërkim është edhe i dashuri i saj, Ervin Mata.
Pas verifikimit të sistemit Tims, këngëtarja është larguar nga Shqipëria pak orë pas ngjarjes. Por, Gjata nuk ka dhënë më parë asnjë shpjegim në polici. Kjo është edhe arsyeja përse këngëtarja është shpallur në kërkim.
Dëshmia e Gjatës mendohet të jetë kyçe për zbardhjen e rrethanave të ngjarjes, që përfundoi me një të vdekur e dy të plagosur.
Rreth orës 05:00 të mëngjesit të së premtes, këngëtarja ka fluturuar nga Rinasi në drejtim të Austrisë. Më pas, sipas të dhënave të siguruara nga Policia, ka udhëtuar drejt Gjermanisë ku edhe mendohet se ndodhet aktualisht.
Të afërm të Elvanës janë shprehur se udhëtimi i këngëtares ka qenë i planifikuar, pasi ajo kishte një koncert atje dhe nuk është larguar për t’iu shmangur hetimit.
