Kryeministri Rama gjatë takimit që zhvilloi sot me disa studentë dhe pedagogë në Universitetin e Ekonomikut, është pyetur nga një studente se për sa kohë që qeveria fajëson rektorin për një sërë problemesh në universitete, pse nuk bëhet një ligj për ta shkarkuar atë.
Ndërkohë, Rama i përgjigjet se rektori qëndron në postin e tij më rehat se sa një mbret, për shkak të autonomisë që kanë sot universitetet.
“Nuk është mbret por është më rehat se çdo mbret. Unë besoj personalisht, që ligji aktual i arsimit të lartë, fuqia që ligji i jep të gjitha strukturave të tjera janë të mjaftueshme pa llogaritur fuqinë që ka çdo student që e patë vetë kur bëheni bashkë që rektori reago brenda 24 orësh. Kjo është rruga më e shëndetshme, dhe do të vendosë një standard tjetër sjellje të rektorit dhe rektoratit me gjithë pjesën tjetër.
Se ka ndodhur protesta dhe i vetmi që nuk e ka marrë vesh dhe rrezik akoma nuk e di, është rektori. Kjo është pikëpyetje në radhë të parë për ju si studentë.
Rektorin e keni aty, më afër se Ministria. Sidoqoftë nuk është për të shmangur përgjegjësinë por për të shpjeguar dhe ilustruar që autonomia është edhe përgjegjshmëria juaj”, tha Rama.
Disa studentët ngritën shqetësimet e tyre që kishin të bënin me mos rikonstruksionin e godinës, apo edhe mosfunksionimin e bibliotekës dixhitale.
“Biblioteka dixhitale është e paaksesueshme dhe shkak është rektorati. Më e bukura në gjithë këtë histori ju jeni si ata që pinë kafenë në anën lindore të Berlinit, që çdo gjë e kërkonin nga qeveria. Kjo është pjesa e keqmenaxhimit të UT nga rektorati dhe me keqardhje po e them nga rektori”, deklaroi Rama.
