Të rinjtë shqiptarë zgjedhin të mos martohen, ose ta shtyjnë sa më shumë këtë vendim. Kjo dëshmohet edhe nga INSTAT që tregon se martesat në vend kanë një ulje historike. Të dhënat tregojnë se shifrat janë më alarmante në 5 vitet e fundit.
Profesor Edmond Dragoti shprehet se këto shifra janë një lajm i keq e më pasoja për shoqërinë tonë.
“Ulja e numrit të martesave në forma kaq drastike siç ndodh tek ne, sjell uljen e numrit të lindjeve. Ajo pakëson numrin e popullsisë aktive, asaj të aftë për punë. Ngadalësohet zhvillimi ekonomik dhe shoqëror i vendit”, shprehet Dragoti për News 24.
Në kushtet e pasigurisë për të ardhmen, të rinjtë kanë drojë të krijojnë familje.
“Fakti që të rinjtë sot nuk kanë hapësira dhe mundësi për të planifikuar një martesë të qëndrueshme, lidhet me pamundësitë për të pasur një punë të sigurt dhe të ardhura të sigurta”.
Sipas INSTAT, norma bruto e martesës, pra numri i martesave për mijë banorë është 7,7 martesa. Lezha mban rekordin me 10,2 martesa për mijë banorë. Më e ulëta është regjistruar në Tiranë me 6,8 martesa për mijë banorë.
Komunikimi online
Edhe komunikimi online thotë Dragoti i prish shumë punë martesës:
“Prish shume punë natyrisht, të rinjtë e vlerësojnë më pak nevojën e njëri-tjetrit dhe praninë e njëri tjetrit. Më të lehte e kanë të komunikojnë me telefon sesa të jenë ballë për ballë, ta shikojnë të kuptojnë ta njohin njëri tjetrin në kushte të tjera. Mungesa e komunikimit të drejtpërdrejtë i bën më pak qytetarë më pak njerëzorë, më pak të mundshëm për të menduar për një martesë dhe formalitete të kësaj natyre.”
Martesa shikohet nga ekspertët si pjesë e listës së detyrave që duhen bërë në jetë për të qenë individ i suksesshëm. Vendimi për të mos u martuar është alternativë e gabuar:
“Suksesi i një individi është të trashëgojë veten, sa më shumë ta trashëgosh veten aq më i suksesshëm do jesh në jetë.”
