Ditën e djeshme në qytetin e Lushnjës, të mbijetuarit e kampeve të përqendrimit përkujtuan ngritjen e një memoriali dhe kryen homazhe për ata që humbën jetën në këto kampe.
Mirëpo disa mosmarrëveshje bënë që kjo ceremoni të shoqërohej nga disa incidente. Shkak për incidentin e parë u bë mospërmendja e disa fiseve që nuk ishin përfshirë në kumtesat e ceremonisë.
I pranishëm në këtë ceremoni ishte edhe deputeti i PS-së, Bashkim Fino, prezenca e të cilit shkaktoi shumë polemika.
Familjarët e të përndjekurve e kanë konsideruar këtë si një provokim që u bëhet atyre, ndaj dhe kërkuan largimin e Finos nga salla.
“Pse je ti këtu, ti je i Partisë Socialiste. Ti nuk ke të drejtë të flasësh. Nuk ke të drejtë të jesh këtu. Unë jam rritur rrugëve të Italisë dhe na e keni borxh”, tha një përfaqësues i të përndjekurve në sallë.
“Bashkim Fino nuk duhet të ishte sot këtu”, u shpreh një tjetër.
Mirëpo, Fino u është përgjigjur se ai nuk ka asnjë përgjegjësi për këtë dhe se ai ishte i pranishëm për të vlerësuar sakrificën e tyre dhe për ti mbështetur.
“Po unë ç’lidhje kam me këto që thua ti. Prezenca jonë këtu është për të vlerësuar dhe aspak për të denigruar. Prezenca e kryetarit të bashkisë së Lushnjës dhe e imja si deputet i qytetit është në funksion të vuajtjeve që kanë kaluar këta të persekutuar”, tha Fino.
