Më 9 tetor 1944 Uiston Çërçilli takohet në Kremlin me Stalinin. Orët e vona të asaj mbrëmje, të dy nën efektin e alkoolit, do të bënin ndarjen e zonave të ndikimit në Europë. Pjesa lindore e saj, përfshi Shqipërinë mbetën nën sferën sovjetike. Megjithatë në muajt e parë pas fundit të luftës, Enver Hoxha druhej se anglezët mund të lejonin një copëtim të ri të vendit në favor të fqinjëve grekë dhe jugosllavë.
Stefën Piters, anëtar i Misionit Ushtarak Amerikan në Tiranë, shkruante se Hoxha ishte tepër i shqetësuar se mos Stalini ua jepte anglezëve Shqipërinë dhe ishte kjo arsyeja që e detyroi atë të shkonte personalisht për herë të parë dhe të fundit në Zyrën e Shërbimeve Strategjike (OSS) Amerikane në Tiranë më 11 shkurt, në një përpjekje të qartë për të mësuar nëse çështja e Shqipërisë kishte qenë trajtuar në Konferencën e Jaltës.
Pas një takimi tjetër me Hoxhën më 19 shkurt, Pitërsi i shkruante qendrës së vet për ankesat e qeverisë shqiptare se i mungonte informacioni nga Konferenca e Jaltës mbi të ardhmen e Shqipërisë dhe se anëtarët e qeverisë e ndiejnë veten se po trajtohen padrejtësisht dhe se vendi i tyre po bllokohet nga pjesa tjetër e botës.
