Çdo ditë e më shumë të jepet ndjesia se opozita është edhe më e riorganizuar. Por përpos anëve pozitive, gjithmonë ekziston edhe ana tjetër e medaljes, ajo e hatërmbetjeve. Kryemadhi, në një nga daljet e saj mediatike nuk hezoi të shprehte pakënaqësitë e saj. Sipas saj, ka ardhur koha që opozita të jetë e mirëorganizuar.
Deri më tani, reagimet e zëshme e jo vetëm kanë qenë një një nivel denoncues, ndaj asaj që e konsideron politikë të lidhur me krimin. Dy nismat më të fundit ligjore të Partisë Demokratike, që janë “Vetting në politikë”, dhe përfshirja në ligjin antimafie edhe të koncesioneve publike, kanë krijuar terrenin e përshtatshëm për një betejë sa institucionale, aq edhe publike.
Njëkohësisht me pjesën denoncuese, partitë opozitare janë grupuar të gjithë në bllok, dhe po nisin kalkulimet për zgjedhjet e ardhshme lokale. E nga ana tjetër, qeveria nuk ka qëndruar në vend-numëro. Nismave opozitare, qeveria i është përgjigjur me “hedhje paraje” në prag të fushatës për zgjedhjet lokale.
Provat i dha dje Rama, ku gëzoi familjet shqiptare me shpërblimet për bebet. Një ditë më parë, kryeministri Edi Rama shkaktoi një furtunë të madhe, pasi premtoi rritjen e shpërblimit për fëmijët që do lindin pas 1 Janarit të vitit të ardhshëm. Shumë skeptik dolën e folën kundër, ashtu sikundër ndodh në çdo nismë.
Nisma e qeverisë shënon nisjen e fushatës së socialistëve për zgjedhjet lokale. Me anë të një deklarate për mediat, kreu i qeverisë lajmëroi rritjen e pagave për mësuesit, punonjësit e shëndetësisë dhe ushtarakët, dhe njëkohësisht edhe rritjen e shpërblimit për lindjen e bebeve nga 1 Janari i vitit të ardhshëm dhe në vijim.
Qeveria lançoi këtë nismë si një politikë të re sociale, që do të nxisë rritjen e popullsisë, duke shpërndarë nga Janari 2019 një bonus prej 400 mijë lekësh për fëmijën e parë, 800 mijë lekësh për fëmijën e dytë, dhe 1 200 mijë lekë për fëmijën e tretë të lindur në çdo familje.
“Më e bukura është që do të bëjmë për fëmijët e sapolindur në vend. Në vitet 2000 pata lançuar si kryetar i Bashkisë, çekun e bebes, 50 mijë lekë të vjetra, që u prit shumë mirë, por mbeti aq për shumë e shumë vite, por u kthye në problem, dhe në malin e borxheve nga qeveria e mëparshme kishim edhe borxh 5 milionë dollarësh për bebet që nuk kishin marrë çekun, po e shlyem.
Që nga 1 Janari i vitit të ardhshëm, çdo fëmijë i parë i një çifti do të marrë tetë-fishin e kontributit, 400 mije lekë, fëmija i dytë 800 mije lekë dhe fëmija i tretë 1 milionë e 200 mijë lekë. Çdo bebe që lind në maternitetet e vendit do të regjistrohet aty, nuk do të jetë për të bërë gjithë procedurën e komplikuar në gjendjen civile aty dhe do të marrë menjëherë çekun për mirëseardhjen në jetë si ndihmë direkte për familjet.
Masë për të gjithë familjet qe lindin ne vend, nuk do të ketë asnjë dallim”, tha Rama, ndërsa shtoi se kjo nismë do hyjë në fuqi nga 1 Janari dhe në vijim. Kujtojmë këtu faktin se deri më tani, për çdo bebe të ardhur në jetë akordoheshin 5 mijë lekë të rinj, dhe kjo shumë merrej pas një kohe të gjatë.
