Anëtarët e PS në Komisionin Hetimor për Inceneratorët kanë kallëzuar penalisht në SPAK kryetaren e këtij Komisioni, Jorida Tabakun. Deputetja Ermonela Felaj ka deklaruar se Tabaku akuzohet për “shpërdorim detyre”.
Felaj tha se anëtarët e PS në këtë Komision kanë kallëzuar në SPAK Tabakun, pasi kjo e fundit ka zhvilluar sot një takim me kreun e SPAK, Arben Kraja, pa u mandatuar nga komisioni përkatës. “Ju keni shkuar pranë SPAK si kryetare e këtij Komisioni, pa qenë e mandatuar. Veprimi juaj është në kundërshtim të hapur me ligjin e Komisioneve Hetimore të Kuvendit që ju detyrojnë juve që të mos ushtrojë asnjë tagër që ju jep ligji. Për këtë arsye ne anëtarët e këtij Komisioni, kemi vendosur që ti drejtojmë një kallëzim penal SPAK për shtetasin Jorida Tabaku për dy vepra penale”, tha Felaj.
Deputetët e të dyja palëve kanë ngritur tonet në Komisionin Hetimor për inceneratorët, pasi mazhoranca vendosi të kallëzojë në SPAK, Jorida Tabakun.
Tabaku paralajmëroi Felaj se po bën zhurmuesin ne Komision. “Të nderuar kolege, është i papranueshëm sulmi ndaj SPAK, qe znj. Felaj po bën. I paprecedentë kjo që po ndodh me porosi politike po bllokon Komisionin. Do t’i kërkoj Gardës nëse prishë për etike mbledhjen e këtij komisioni. Znj. Felaj ju tërheq vëmendjen per herë të 10-të!”, tha Tabaku.
Ndërkohë, deputeti demokrat Luçiano Boçi teksa iu drejtua deputetes Felaj i tha se po sillet si prokurore, dhe nuk po zbaton detyrën kushtetuese për të mbrojtur interesin e qytetarëve.
Boçi: Po pse te radha e qumështit je ti? Sillesh si prokurore ti. Sillu si politikane për të mbrojtur interesin politik. Ne jemi këtu për të mbrojtur interesin politik.
Tabaku: Zonja Felaj, me qetësi të lutem
Boçi: Unë të këshilloj të vish aty dhe të mbrosh veten. Ti je ne konflikt interesi, duhet të vish si dëshmitare.
Tabaku: Të nderuar kolegë, ndërkohë që konsumuan pikën e zonjës Felaj
Felaj: Jo nuk e kemi konsumuar
Tabaku: Zonja Felaj bëri një deklaratë e diskutuam, tani të kalojmë në pikën e dytë të rendit të ditës.
Felaj: Zonja Tabaku..
Xhafaj: Kjo që keni bërë ju është jo etike. Duhet të ishin të dyja palët aty, jo vetëm nuk është etike, por as ligjore. Ju në këtë Komision jeni kryetare, mund të moderoni, por jo të interpretoni. Kjo që bëni është jo vetëm e çuditshme, por edhe qesharake. Problemi im më i madh është se vazhdoni të pretendoni se janë fajtor të gjithë, duke kaluar në një gjyq publik.
