Kryetari i Grupit Parlamentar të PS, Taulant Balla ka firmosur sot kërkesën drejtuar Kryetares së Kuvendit, Lindita Nikolla, ku i kërkohet thirrja e Konferencës së Kryetarëve për fillimin e procedurës së zgjedhjes të Presidentit.
“Propozoj që raundi i parë i votimit për zgjedhjen e Presidentit të kryhet në një seancë plenare të posaçme, e cila të mbahet në datën 4 maj 2022”, thuhet në shkresën e Taulant Ballës.
“Ju parashtroj kërkesën që Kuvendi të fillojë procedurën e zgjedhjes së Presidentit më datën 29 Prill 2022. Për këtë qëllim, në cilësinë e Kryetarit të Grupit Parlamentar të PS, ju propozoj thirrjen e Konferencës së Kryetarëve më datë 29 Prill 2022, me këtë rend dite:
Fillimi i procedurave për zgjedhjen e Presidentit të Republikës së Shqipërisë.
Përcaktimi i datës së raundit të parë të votimit për Presidentin e Republikës së Shqipërisë.
Gjithashtu, referuar nenit 87 të Kushtetutës, propozoj që raundi i parë i votimit për zgjedhjen e Presidentit të kryhet në një seancë plenare të posaçme, e cila të mbahet në datën 4 maj 2022”.
Pak ditë më parë, ishte kreu i Grupit Parlamentar të Partisë Socialiste, Taulant Balla, i cili pas përfundimit të mbledhjes së këtij grupi, zbardhi tri emrat e mazhorancës; negociatorë për zgjedhjen e Presidentit të ri. Bëhet fjalë për vetë Ballën, ministren e Shtetit për Marrëdhëniet me Parlamentin, Elisa Spiropali, dhe sekretarin e Përgjithshëm të PS-së, Damian Gjiknuri.
