Opozita e bashkuar sapo ka nisur protestën e saj përpara Kuvendit, duke kërkuar krijimin e një qeverie tranzitore, për të organizuar zgjedhje të lira dhe të ndershme. Protestës i janë bashkuar banorë të Unazës së Madhe, të cilët bashkë me qytetarë të tjerë thërrasin në kor “Rama ik”.
Pavarësisht se Policia e Shtetit i ka refuzuar lejen e protestës, përfaqësuesit e opozitës bënë thirrje që asnjë qytetar të mos trembet nga urdhrat politikë, por të jetë në shesh.
Për të shmangur çdo incident në mbrëmje, Policia e Shtetit e rrethoi perimetrin e sheshit rrethues të Parlamentit me kordon hekuri. Ky kordon do të jetë vija që nuk duhet kaluar nga protestuesit.
Kujtojmë se Basha deklaroi se opozita nuk do ta njohë më Policinë e Shtetit, e cila sipas tij, është vënë e gjitha në shërbim të kryeministrit Rama.
