Prej ditësh, studentët nuk ndalen me protestat, deri në plotësimin e çdo pike të parashtruar prej tyre. Ata për asnjë çast nuk kanë lejuar klasën politike që të përfshihet në këtë çështje, duke kërkuar një përgjigje të plotë vetëm nga Ministria e Arsimit.
Kjo çështje ka marrë jehonë jo vetëm mbarë Shqipërisë, por edhe jashtë trojeve shqiptare. Mediat e huaja e kanë sjellë në fokus, e po një reagim të zëshëm ka patur edhe nga klasa politike. Reagimi i radhës ka ardhur nga ish kryetari i Gjykatës së Kasacionit, sot Gjykata e Lartë, Zef Brozi, i cili u kërkon studentëve që të mos manipulohen nga politikanët, e të jenë vigjilentë për çdo hap që hedhin në këtë tokë të “minuar”.
Ish-kryetari i parë i Gjykatës së Kasacionit të Shqipërisë demokratike, Zef Brozi, ka apeluar ndaj të gjithë studentëve, që të mos lejojnë “manipulimin e tyre nga mafiozët e partive politike, a kushdo tjetër”.
Ndër të tjera, ai thekson se gjendja e mjerueshme e universiteteve shqiptare, nuk është gjë tjetër veçse produkt i të gjitha qeverive në këto 28 vite.
