Presidenti i Bjellorusisë, Alexander Lukashenko, është shprehur i gatshëm të zhvillojë zgjedhje të reja dhe ta dorëzojë pushtetin, pas zhvillimit të një referendumi për ndryshime në kushtetutë.
Deklarata e tij vjen pas protestave të shumta në Minsk, ku mijëra qytetarë kundërshtojnë rezultatin e zgjedhjeve të një jave më parë. Rezultatet e zgjedhjeve e shpallën fitues me më shumë se 80% të votave presidentin aktual Lukashenko.
“Ne i kemi zhvilluar zgjedhjet. Vetëm kur të më vrisni, do të ketë zgjedhje të reja. Ndryshimet do t’i miratojmë me një referendum dhe unë do t’i dorëzoj fuqitë e mia kushtetuese. Por jo për shkak të presionit në rrugë. Nuk jam shenjtor. E njoh anën time të ashpër. Nuk jam i përjetshëm. Por nëse largoni me forcë presidentin e parë, kështu do të bëni edhe me vendet fqinje e të tjerë”, tha ai në një fjalim para punëtorëve të një fabrike shtetërore
Ai deklaroi se në vend mund të zhvillohen zgjedhje parlamentare e presidenciale pas referendumit, nëse kjo do të jetë ajo që populli dëshiron.
