Pak orë para fillimit të protestës së opozitës, Policia Rrugore njofton shoferët për bllokimin e plotë të autostradës Tiranë-Durrës për shkak të punimeve.
Teksa opozita ka paralajmëruar pjesëmarrjen e mijëra protestuesve nga rrethet që pritet të vijnë në autobusë, policia u bën thirrje shoferëve nga Jugu i Shqipërisë të shmangin plotësisht kalimin nga autostrada Tiranë-Durrës, dhe të kalojë përmes Rrogozhinës –Peqinit – Elbasanit dhe më pas përmes tunelit drejt Tiranës.
Demokratët kanë akuzuar qeverinë se po tenton të bllokojë akset kryesore, në mënyrë që të pengojnë qytetarët të marrin pjesë në protestë.
NJOFTIM I POLICISË RRUGORE PËR SHMANGIEN E TRAFIKUT
Për shkak të punimeve në rrugën interurbane kryesore Tiranë-Durrës (autostrada), shërbimi i Policisë Rrugore, nisur nga kryerja e punimeve, iu sugjeron drejtuesve të mjeteve që udhëtojnë nga Tirana drejt Jugut, kryesisht drejt Lushnjës, Beratit, Vlorës, Fierit, Gjirokastrës dhe zonave të tjera, për të mos u vonuar mund të zgjedhin si variant alternativ kalim nga Rruga e Elbasanit drejt Tunelit – Elbasan-Peqin Rrogozhinë-Jug.
Gjithashtu edhe drejtuesit e mjeteve që kthehen në Tiranë nga këto zona, për t’u kthyer më shpejt dhe për të evituar ngarkesën dhe vonesat drejt Tiranës mund të ndjekin këtë itinerar.
Në autostradë po vazhdojnë punimet nga kontraktori, ndërkohë që ka prezencë të shtuar të Policisë Rrugore.
Shërbimi i Policisë Rrugore kërkon mirëkuptimin që të respektohet në maksimum sistemi i sinjalizimit vertikal dhe horizontal i përkohshëm në këtë segment rrugor, me synim evitimin e bllokimeve dhe të aksidenteve të mundshme.
