Kreu i Departamentit të Mjedisit në Partinë Demokratike, Jamarbër Malltezi, ka reaguar pas vendimit të ministrit Blendi Klosi për t’iu bashkuar sot banorëve të Beratit në protestën për mbrojtjen e Parkut të Tomorrit. Malltezi deklaron se “protesta” e Klosit me disa militantë ishte e neveritshme dhe e turpshme.
“Ajo që e shoh si skandaloze dhe tallje të rëndë me qytetarët është shfaqja e turpshme e Blendi Klosit. Siç shikohet edhe në dokumentet e paraqitura para gjykatës, shoqëritë e kanë hedhur në gjyq qeverinë dhe e kanë fituar gjyqin me të, pasi VKM është miratuar pa ndjekur asnjë procedurë dhe subjektet janë të licensuar nga vetë qeveria Rama për shfrytëzim të guroreve në zonën e zgjeruar me VKM-në e vjetshme. Këto licensa janë rinovuar herë pas here. Njëra prej tyre, që del në dokumentet e gjykatës është e vitit 2016, kështu që Blendi Klosi mund të pyesë Damian Tërmetin dhe Lefter Kokën për më shumë detaje”, thekson ndër të tjera Malltezi.
Deklarata e plotë:
Sa më shumë zona të mbrojtura, të ketë në Shqipëri dhe jo beton oligarkësh, sa më shumë pyje dhe jo zona kanabisi, aq më mirë është për vendin. Por kjo “protesta” e sotme e Blendi Klosit me disa militantë, për gjoja mbrojtjen e Parkut Kombëtar në Malin e Tomorrit, është e neveritshme dhe e turpshme!
Blendi Klosi “protestonte” sot kundër vendimit të Gjykatës, e cila me kërkesën e shoqërive private, ka rrëzuar VKM e vitit 2018 për zgjerimin e Parkut Kombëtar edhe në zonat tradicionale të gurorëve.
(Nuk kam ndërmend të komentoj VKM për zgjerimin e Parkut, që sipas ekspertëve është demagogji, sepse çfarë ia vlen për t’u ruajtur atje, është vendosur në ruajtje në 2012-ën. Nuk do të komentoj as gjetjet e gjykatës, që sjell prova se VKM nuk ka zbatuar asnjë procedurë.)
Ajo që e shoh si skandaloze dhe tallje të rëndë me qytetarët është shfaqja e turpshme e Blendi Klosit. Siç shikohet edhe në dokumentet e paraqitura para gjykatës, shoqëritë e kanë hedhur në gjyq qeverinë dhe e kanë fituar gjyqin me të, pasi VKM është miratuar pa ndjekur asnjë procedurë dhe subjektet janë të licensuar nga vetë qeveria Rama për shfrytëzim të guroreve në zonën e zgjeruar me VKM-në e vjetshme.
Këto licensa janë rinovuar herë pas here. Njëra prej tyre, që del në dokumentet e gjykatës është e vitit 2016, kështu që Blendi Klosi mund të pyesë Damian Tërmetin dhe Lefter Kokën për më shumë detaje.
Nëse qeveria donte të zgjeronte vijën e parkut kombëtar të Tomorrit, do të duhej që
a) të anullojë lejet dhe licensat që ka lëshuar Rama-Gjiknuri-Balluku-Koka për guroret.
b) të hapë proces konsultimi publik sipas ligjit.
c) ndryshimin e përdorimit të tokës ta kalojë në KKT siç e kërkon ligji.
(Për më tepër nëse Klosit i qan zemra për zonat e mbrojtura mjafton të mos i japë gjithë buxhetin prej 800,000 eurosh të agjencisë së zonave të mbrojtura pikërisht drejtorit Dedej shok të Edi Ramës që ka formuar dy shoqata për të përlarë gjithë buxhetin.
Ose të heqë guroret nga fondi pyjor mu buzë detit në Palasë fjala bie). Prandaj, shfaqja e sotme është poshtëruese për shqiptarët, që, për fatin e keq, drejtohen nga një qeveri që i vjedh natën e i qan ditën.
