Udhëheqësi suprem i Iranit ka fajësuar SHBA-në dhe Izraelin për protestat që kanë përfshirë vendin, pas vdekjes së një gruaje ndërsa ishte në paraburgim nga policia.
Në komentet e tij publike mbi trazirat, Ayatollah Ali Khamenei tha se “trazirat” ishin krijuar nga armiqtë e mëdhenj të Iranit dhe aleatët e tyre. Protestat janë sfida më e madhe për sundimin e tij për një dekadë, dhe ai u kërkoi forcave të sigurisë të jenë gati për më shumë.
Shtetet e Bashkuara thanë se ishin “të tmerruara” nga reagimi i dhunshëm ndaj protestave. Presidenti Joe Biden tha se ishte “shumë i shqetësuar” për raportet për “intensifikimin e shtypjes së dhunshme ndaj protestuesve paqësorë”.
Ata protestues po bënin thirrje për “parime të drejta dhe universale”, tha ai, duke shtuar se SHBA “qëndrojnë me gratë iraniane” të cilat “po frymëzonin botën me trimërinë e tyre”. Mahsa Amini, një grua kurde 22-vjeçare, ra në koma disa orë pasi u arrestua nga policia e moralit më 13 shtator në Teheran, për dyshimin se kishte thyer ligjin e rreptë që u kërkon grave të mbulojnë flokët me një hixhab ose shami. Ajo vdiq tre ditë më vonë.
Familja e saj ka pretenduar se oficerët e kanë rrahur me shkop dhe e kanë goditur kokën në një nga automjetet e tyre. Policia ka thënë se nuk ka prova për ndonjë keqtrajtim, dhe se ajo pësoi “insuficiencë të papritur të zemrës”. Gratë kanë udhëhequr protestat që filluan pas funeralit të zonjës Amini, duke tundur shamitë e tyre në ajër ose duke u vënë flakën atyre me thirrjet “Grua, jetë, liri” dhe “Vdekje diktatorit”, një referencë për Ayatollah Khamenei.
Marrë me shkurtime nga BBC. Përshtatur nga Tirana Today
