Pavarësisht se ishte paralajmëruar për dhunë, protesta e sotme përfundoi pa incidente. Gjatë mesditës, PD dhe opozita e bashkuar dorëzuan në Kryesinë e Kuvendit listat me mandatet e deputetëve. Nga PD nuk e kanë dorëzuar ende mandatin dy deputetë, Rudina Hajdari dhe Myslim Murrizi. Ndërsa nga LSI, deputeti Lefter Koka ka deklaruar se nuk do të heqë dorë nga mandati.
Opozita protestoi fillimisht përpara Parlamentit, ku mbajtën fjalime të shkurtra që u përmbyll me fjalimin e kryedemokratit Lulzim Basha. Më pas, opozita dhe protestuesit u drejtuan për tek Kryesia e Kuvendit, ku bënë dorëzimin e mandateve të deputetëve. E më tej protestuesit marshuan drejt selisë së PD, ku dhe u përmbyll protesta.
Pas dorëzimit të mandateve në kryesinë e Kuvendit, kreu demokrat Lulzim Basha, tha nga selia blu se sot opozita i vuri kryqin Parlamentit.
“Nuk na duhen valët, se kemi valën popullore. Liri-demokraci. E duam Shqipërinë si gjithë Europa. Zonja dhe zotërinj, misionarë të shpresës dhe të nesërmes europiane të Shqipërisë, opozita parlamentare sot dorëzoi mandatet dhe i vuri kryqin Parlamentit të krimit.
Prej sot, ne jemi qytetarë të thjeshtë në krahun tuaj, me ju dhe për ju. Nisëm sot një rrugëtim shprese i cili nuk do ndalet derisa testimi europian i këtij vendi, të bëhet realitet, derisa ta largojmë kryehajdutin dhe qeverinë e tij kriminale. Rama ik!
Le ta shpërndajmë këtë energji hyjnore që mund të burojë vetëm nga shpirti i një rrace fisnike siç jemi ne, në çdo cep të Shqipërisë të nisim këtë rrugëtim për rrëzimin e regjimit kriminal, për largimin e Maduros së Ballkanit e Europës.
E nesërmja po vjen. Shqipëria do ketë një të ardhme dhe kjo e ardhme nuk i takon kriminelëve. Shqipëria do ketë një të ardhme dhe kjo do jetë e ardhmja juaj, e njerëzve të ndershëm të këtij vendi që do i japin fund padrejtësisë, pandëshkueshmërisë, parlamentit të krimit.
Do i japim fund siç i dhamë sot, me zgjedhje evropiane do kemi një qeveri të popullit, për popullin.
Shqipëria do ketë një të ardhme, derën e Evropës do e hapim. Ky është mesazhi i popullit të bashkuar. E duam Shqipërinë si gjithë Evropa.
Bëhuni gati për betejen e rradhës, në Tiranë, Korçë, Elbasan, Tropojë, Dibër, Sarandë, anë e mbanë vendit.…”, tha kryedemokrati nga selia blu.
