Gjashtë persona kanë humbur jetën, si pasojë e protestave që shpërthyen për rritjen e çmimit të naftës në disa qytet të Iranit.
Mes viktimave janë tre protestues, dy pjesëtarë të forcave iraniane të sigurisë dhe një roje e sigurisë. Gjithsesi, dyshohet se numri i viktimave mund të jetë shumë më i lartë.
Mësohet se autoritetet vendase kanë urdhëruar po ashtu ndërprerjen e Internetit në disa zona, gjë që ka limituar edhe publikimin e videove në mediat sociale.
Nëpërmjet një deklarate për mediat, Garda Revolucionare e Iranit paralajmëroi se do të ndërhyjë, nëse trazirat nuk pushojnë.
Sipas Agjencisë së Lajmeve “Fars”, më shumë se 100 banka dhe dyqane janë djegur gjatë protestave dhe rreth 1,000 njerëz janë arrestuar.
Ndërkohë, presidenti Hassan Rohani deklaroi njerëzit mund të protestojnë, por jo të nxisin trazira.
“Qeveria nuk do të lejojë askënd të shkaktojë trazira dhe pasiguri. Sidoqoftë, protesta është e drejtë e njerëzve. Ata mund të protestojnë, mund të flasin dhe mund të kritikojnë”, tha Rohani.
