Bashkia e Korçës ka reaguar lidhur me protestën e fermerëve, të cilët hodhën prodhimet e tyre në rrugë, pasi nuk u lejuan të hynin në tregun e shumicës ku punojnë çdo ditë.
Konflikti i tregtarëve të shumicës dhe të pakicës me fermerët, ka sjellë edhe reagimin e bashkisë, që me anë të policisë bashkiake ka nxjerrë jashtë fermerët si nga tregu i shumicës ashtu dhe nga “Markata e Shijes”, duke iu kërkuar të pajisen me Nipt si biznes dhe jo vetëm si fermerë. Jo vetëm kaq, por t’iu përmbahen kushteve dhe marrëveshjes me bashkinë.
Tregtarët e markatos kërkojnë largimin e fermerëve që shesin me shumicë. Nënkryetari i bashkisë Korçë, Kletjon Kita tha se fermerët duhet të pajisen me Nipt.
“Nisëm aksionin për mos lejimin e tregtarëve në tregun e shumicës. Fermerët duhet të pajisen me Nipt, dhe të tregtojnë prodhimet në “Markaton e Shijes”. Do vijojmë me aksionin për shmangien e përplasjes mes tyre”, deklaroi Kita.
Ditën e sotme protestuan fermerët dhe tregtarët në Korçë. Fermerët protestuan pasi nuk u lejuan të futeshin në treg, dhe në shenjë revolte bllokuan unazën e qytetit. Sakaq, u kundërpërgjigjën tregtarët me protestë: Shumica na shet me kile, na është ulur puna.
