Pronari i hotel “Voloreka” në Pogradec, Jetmir Muçllari, ka dhënë emra konkretë se cilët beson ai se fshihen pas dy atentateve në hotelin e tij.
Në një prononcim për mediat, Muçllari tha se Nehar Berberi dhe Ilir Rrushi janë 2 personat që kanë qëlluar me armë zjarri në drejtim të hotelit të tij.
Ai theksoi se këta të fundit janë kriminelët më të mëdhenj në Pogradec.
“Nehar Berberi dhe Ilir Rrushi janë dy autorët. Ata janë kriminelët më të mëdhenj në Pogradec. Fillimisht autorët qëlluan në drejtim të rojes së hotelit, duke i kërkuar që të mos lëvizte. Plumbat dëmtuan dy makinat e mia dhe të djalit dhe 4 mjete të turistëve. Jemi të kërcënuar si familje. Kërkojmë mbrojtje nga pòlicia”, tha ai.
Pronari i hotelit tha për mediat se i ka denoncuar edhe në Polici dy atentatorët. Sipas tij, ata kanë qëlluar në drejtim të dhomës ku flinte djali, dhe dy dhomave të tjera ku po qëndronin disa pushues.
