Studentë dhe pedagogë të Universiteti Bujqësor të Tiranës kanë protestuar sot, duke kundërshtuar vendimi e Bashkisë së Tiranës për të ndërtuar një shkollë në pjesën e fidanishtes, ku ata zhvillonin mësim.
Lidhur me këtë vendim të bashkisë, ka folur nënkryetari Arbjan Mazniku, i cili thotë se prona nuk është e universitetit, por ka qenë private dhe tani është shpronësuar nga bashkia.
Në një lidhje telefonike me televizionin News 24, Mazniku pohoi se banorët e kësaj zone janë dakord për të ndërtuar shkollën, ndërsa shtoi se ndërtimi i saj nuk do të cenojë aspak procesin mësimor të studentëve dhe të pedagogëve të Bujqësorit.
“Së pari, ajo zonë ka qenë fidanishte përpara viteve ’90. Kjo tokë i është kthyer pronarit, është truall privat. Do të ndërtohet kampusi dhe pikërisht për këtë logjikë është diskutuar për masterplanin. Nga ana tjetër, banorët e Kodër-Kamzës e duan një shkollë. Çfarë të bëjmë? Të prishim shtëpitë për të ndërtuar shkollë. Unë kam qenë në disa takime. Shkolla nuk e duan që të jetë aty, por duan fidanishte. Do të jetë një shkollë nëntëvjeçare dhe e mesme, e integruar.
Ajo është nevojë kryesore e asaj zone dhe nuk cenon pjesën e kampusit. Për sa kohë kemi një tokë të lirë. Është marrë në pronësi të bashkisë së Tiranës. Aty kemi një hapësirë që nuk i prish punë masterplanit, ishte tokë private të cilën e kemi shpronësuar. Kampusi do të funksionojë si pjesë e integruar. Plani i zhvillimit të qytetit i le atë zonë me funksion arsimor, dhe është brenda filozofisë. Nuk kemi asnjë konflikt planifikimi.
Ishte private përpara korrikut që shkoi, por sot është një pronë e bashkisë së Tiranës, e cila do t’i jepet banorëve për një shkollë publike, e cila është shumë të nevojshme. Kjo shkollë do të ndërtohet me PPP. Shkollën do ta ketë gati deri në 2020. Unë do të shkojë atje të flasë me studentë, por kemi biseduar gjatë me banorët e zonës dhe e duan këtë shkollë. Pedagogëve dhe studentëve iu premtojë se shkolla nuk iu cenon asnjë proces mësimor, por përkundrazi do t’ua kthejë kampusin në hapësirë më miqësore”, tha nënkryetari i Bashkisë së Tiranës.
