Prokuroria e Elbasanit ndryshon akuzën ndaj Shkëlzen Hasanpapës, i cili dyshohet si vrasës me pagesë i bandës rivale të Capjave në Elbasan.
Kjo prokurori ka vendosur që akuza të jetë “vrasje duke rrezikuar jetën e shumë personave”.
Hasanpapa ka 10 ditë afat për t’u njohur me akuzën e re.
Pesë ditë më parë në nisje të seancës ndaj tij, forca të shumta policie janë parë jo vetëm në gjykatë, por edhe në të gjitha akset përreth Gjykatës dhe Prokurorisë së Elbasanit.
Kontrolle të rrepta janë zhvilluar në të gjithë zonën ku ndodhen institucionet e drejtësisë në Elbasan para fillimit të seancës.
Kujtojmë se mbi të janë ngritur vetëm akuzat e “plagosjes së lehtë me dashje”, “kanosjes” dhe “armëmbajtjes pa leje”.
Në qershor të 2016 në qendër të Elbasanit, Hasanpapa tentoi të vriste Florenc Capjan dhe mikun e tij Bledar Muca. Ai derdhi 20 plumba në drejtim të shënjestrave, të cilët shpëtuan, pasi makina me të cilën udhëtonin ishte e blinduar. Në ngjarje mbeti e plagosur një oficere policie.
Shkëlzen Hasanpapa, u identifikua si autor i dyshuar i ngjarjes pas krahasimit të ADN, që iu mor prindërve të tij, shkruan bw. Ai u arrestua në Holandë dhe më vonë u ekstradua drejt Shqipërisë.
