Në seancën e sotme gjyqësore ndaj biznesmenit Sota, u bënë publike dy detaje që tregojnë se Prokuroria po vepron me dy standarde ndaj biznesmenit Sota dhe ndaj partnerëve të tij, pronarëve të kompanisë “Kurum”.
Njëra dëshmi që del nga përgjimet, ka të bëjë me faktin se patentat e familjes Tahiri, ishin lënë aty nga shoferi i tij, që ka lidhje me shoferin e biznesmenit Sota. Kjo del nga përgjimet e autorizuara ligjërisht dhe jo nga ndonjë deklaratë politike. Gjykata është në të drejtën e saj të vlerësojë rëndësinë e kësaj prove.
Prova e dytë janë sms-të e Lefter Sotës, babait të djalit që është në burg. Ato provojnë negociatat me pronarin e “Kurum”-it, dakordësinë për të dërguar djalin me para, si dhe momentin kur është arrestuar djali nga policia.
Nuk dua të përfshihem në debatin mbi fajësinë e djalit të Sotës, dhe po i marr të mirëqena fajet e tij për transport ilegal parash dhe pagesa jashtë sistemit bankar për kompaninë “Kurum”. Por provat e bëra publike, janë të mjaftueshme që në këtë dosje të përfshihen drejtuesit e kompanisë “Kurum”.
Përtej këtij rasti, dhjetëra biznesmenë të tjerë që kanë marrëdhënie me këtë kompani, e pohojnë faktin se qyshkurse ata janë vënë nën sekuestro për shkak të borxheve dhe janë në proces likujdimi, ata vazhdojnë punojnë në të zezë përmes pagesave nën dorë. Kjo madje është aq e rëndë, sa në këtë dosje duhen përfshirë dhe institucione financiare të Shqipërisë, që nga Drejtoria e Tatimeve Elbasan, e deri në qendër.
Por minimalisht, për të respektuar provat e bëra publike, drejtuesit e “Kurum”-it duhet të përfshihen nën hetim.
Këmbëngulja e prokurorëve për t’i mbajtur ata jashtë dhe qëndrimi i tyre partizan në këtë çështje, duke shtuar fajësinë se ka gjetur dy monedha false 50 euroshe (a thua se në 853 mijë euro, ky Sota ishte keq për 100 euro), si dhe deklaratat verbale të tyre, të fokusuara tek Tahiri, e dëmtojnë në thelb hetimin.
Askush nuk duhet të bëjë presion mbi procesin, por injorimi nga Prokuroria i fakteve që zbardhin të vërtetën, është dhunë e prokurorëve mbi hetimin dhe konfirmim i qëndrimit politik të tyre në këtë proces. Fakti që administratori ligjor i “Kurum”-it mohon transaksionin, por një prej pronarëve të tij është i provuar që ka negociuar për këtë pagesë nën dorë, është fakt i mjaftueshëm që ata të merren nën hetim dhe t’i bashkohen kësaj dosje hetimore.
Kjo nuk ka lidhje me ndëshkimin e biznesmenit Sota. Ai mund të ndëshkohet pse i ka dhënë makinës pa patentë, apo që nuk i ka ndaluar policit, mund të dënohet pse paguan “Kurum”-in nën dorë, por nuk mund të përdoret si personazh i një filmi të prodhuar paraprakisht, për ta ilustruar atë si personazh. Fakti që Prokuroria injoron fajet e tij të dukshme, siç është mosndalimi i policisë apo ngjarja e makinës pa patentë, dhe fokusohet tek dyshimi “se këto mund të jenë paratë e Saimir Tahirit”, tregon se ata janë më shumë të interesuar për skenarin që kanë në kokë, se sa për realitetin. Dhe kjo mund ta dëmtojë hetimin e çështjes më shumë se sa e kanë dëmtuar vetë prokurorët në fillimin e saj, me partizanllëkun e tyre, në traditën më të keqe të Prokurorisë sonë, që kur heton çështje politike, më shumë ka dëshirë të bëjë politikë, se drejtësi./Tema/
Pse rrogat rriten në letra, por varfëria rritet në realitet?
