Mes Wanda Narës dhe Mauro Icardit është futur sërish ish-burri i modeles, Maxi Lopez dhe çështja pritet të bëhet e madh. Bashkëshortja, njëkohësisht dhe menaxherja e Icardit rrezikon katër muaj burg dhe kërkesa është bërë nga zëvendësprokurori i Gjykatës së Milano-s.
Akuza është bërë për shkak të shpërndarjes së të dhënave personale në rrjetet sociale, duke përfshirë edhe numrin e celularit të ish-burrit. Ngjarje e cila ka ndodhur më 22 qershor të 2015-ës. Pas përfundimit të martesës dhe një serie akuzash ndaj njëri-tjetrit, bukuroshja argjentinase (sipas akuzës) ka vendosur të publikojë në rrjetet sociale të dhënat personale të ish-burrit.
Një situatë që i krijoi jo pak probleme ish-sulmuesit të Milan-it, i cili ka thënë se situata e krijuar pati pasoja edhe në merkato, duke e bërë të vështirë për sulmuesin që të gjente skuadër.
Ndërkohë, avokati i Nara, Giuseppe di Carlo, ka kërkuar shfajësimin e klientes së tij, sepse “nuk ka asnjë provë përgjegjësie” të gruas. “Nuk ka asnjë provë që ajo të ketë qenë autorja e postimeve në rrjetet sociale dhe as që i ka shkaktuar një dëm lojtarit”, ka thënë Di Carlo. Vendimi i gjykatës do të jepet më 29 tetor.
