Ditën e sotme ishte programuar që të mbahej seanca gjyqësore për ish-deputetin Klevis Balliu, por që është shtyrë. Prokuroria kërkon për Balliun “arrest shtëpie”, për përplasjen që pati me policinë gjatë një proteste me banorët e Unazës së Re.
Në një prononcim për mediat Balliu u shpreh se kërkesa e Prokurorisë nuk bazohet në ligj. Dhe se këto përpjekje mjerane, nuk do ta trembin atë, as opozitë dhe as qytetarët.
“Këto janë përpjekje mjerane. As opozita dhe as qytetarët nuk do të ndalojnë. Nuk funksionon shteti, jemi pa qeveri, pa institucione. Del Sandër Kimiku bën edhe filma se gjasme na qenkan dëmtuar policë, në kamera duken vetëm protestuesit. Unë di të them ne jemi gati qoftë në rrugë, prokurori, nuk do ketë ansjë moment që opozita do të ndalet për kauzën më të drejtë. Nuk do të ketë asnjë moment të kësaj opozite që do të ndalet deri sa Edi Rama të largohet. Ai ka qenë akritekti i qindra miliona vjedhjeve. Kush është fajtori për këto vjedhje, për dhunën ndaj qytetarëve”, tha Balliu, duke shtuar se nuk e ndalojnë dot që të jetë çdo pasdite tek ‘Unaza e Re’.
Ndërkohë, teksa po fliste për gazetarët, ish deputeti u shpreh se e njoftuan që kanë arrestuar një tjetër banor të Unazës së Re, personi që muaj më parë goditi me këpucë kryeministrin Rama.
“Sapo më ka ardhur info në një mënyrë absurde që është shoqëruar zoti Ilir Katia, banor i unazës. Është me jelek gjatë gjithë protestës. Arsyeja është këpuca, që është arrestuar njëherë. Sot ata e kanë arrestuar zotin Ilir. Të mos e vazhdojnë më këtë dhunë se do mbajnë përgjegjësi. Nuk do të ketë asnjë hap pas”, tha Balliu.
