Prokuroria e Tiranës ka vendosur ta kalojë dosjen e bujshme të pengmarrjes dhe vrasjes makabre të Jan Prengës, në duart e Prokurorisë së Posaçme (SPAK). 49-vjeçari Prenga u mor peng më 17 janar, në Kamëz, dhe u torturua deri në vdekje nga autorët.
Autoritetet policore po vazhdojnë kërkimet për gjetjen e trupit të 49-vjeçarit Jan Prenga, i cili u rrëmbye më 17 janar në Kamëz.
Prenga u mor peng pas një konflikti droge mes një prej vëllezërve të tij dhe vëllezërve Hajri, për t’u mbajtur peng në resortin luksoz Golden në Shijak.
Ndërkohë Gjykata e Tiranës ka lënë në burg 5 të arrestuarit për rrëmbimin dhe vrasjen e Jan Prengës. Të arrestuarit janë: Bajram Hajrin, Leonard Hajrin, Elton Hajrin dhe Olsi Turjan, të cilët akuzohen për “mbajtje peng” të personit dhe “armëmbajtje pa leje”, si dhe Festim Bexhdili, që u arrestua në Kavajë. Ai akuzohet për “fshehje” dhe “asgjësim” të trupit të pajetë të Prengës.
