“Narcotica” ka transmetuar mbrëmjen e djeshme pjesën e tretë të dokumentarit, ku flitet mbi faktin që Shqipëria është një qendër e trafikut të drogës, dhe në një sipërfaqe të konsiderueshme të territorit kultivohet lëndë narkotike.
Prokurori i antimafias Nicola Gratteri tregoi për Rai3, se një e treta e Shqipërisë është e mbjellë me kanabis, ndërsa deklaroi se mafiozët shqiptarë janë të paprekshëm në vendin e tyre. Po ashtu, shtoi më tej se mafia shqiptare tani është shumë e fortë edhe në Itali, pasi në Shqipëri ajo është njësh me shtetin.
“Në Shqipëri ata janë të paprekshëm. Bëhen të pasur, bëjnë krime. Mafia në Shqipëri ka mbështettje dhe mbrojtje nga të gjitha nivelet e qeverisë nga ata më të ulëta e deri më të larta”, shprehet prokurori i antimafias.
Sipas tij, grupet kriminale shqiptare janë forcuar shumë. “Me kanabisin, shqiptarët sjellin në Itali edhe kokainën. Drogën e fortë shqiptarët shkojnë dhe e marrin vetë në Amerikën Latine. Ne (italianët) nuk duhet që të shqetësohemi vetëm për mafien tonë, por duhet të shqetësohemi shumë edhe për shqiptarët. Ata janë bërë të frikshëm. Vetëm në një goditje kemi kapur 9 ton kanabis në Otranto.”
Po ashtu, prokurori italian që ndodhet në Shqipëri, Francesco Mandoi, ka treguar për ‘Narcotica’ se si një hetim i nisur nga drejtësia italiane ka bërë të mundur bllokimin e një sasi prej 14 mijë kilogramë kokainë që ishte bërë gati në Venezuelë dhe do të sillej në bazën e Porto Palermos në Shqipëri, me nëndetëse.
“Me hetimin tonë ne bëmë të mundur që të shkatërronim një organizatë që kishte bërë një plan të detajuar që të vinte në funksion bazën e nëndetëseve në Porto Palermo për të sjellë kokainën në Shqipëri me nëndetëse, duke e marrë në Amerikën Latine.”
Dokumentari nis me Lazaratin, ku gazetarët e konsiderojnë ende si qendra e kultivimit të marijuanës, pavarësisht se kjo zonë prej kohësh nuk është më e tillë.
“Lazarati është një fshat i vogël në zemër të Shqipërisë që konsiderohet prej kohësh qendra e kultivimit të marijuanës, skena e operacioneve masive policore dhe përplasjeve të armatosura. Shqipëria është një nga vendet kryesore prodhuese të marihuanës, por mbi të gjitha, toka ku kalon kokaina nga Amerika e Jugut dhe kontrollohet opiumi dhe heroina që kalojnë Ballkanin nga Afganistani”, thuhet mes të tjera në shpjegimin e RAI3.
Në dokumentar një zonjë nga Lazarati tregon dhunën që është ushtruar mbi djalin e saj në aksionin e 2014, teksa thotë se është detyruar që të mbulonte të birin me trup, në mënyrë që t’i jepte fund dhunës policore ndaj tij.
