Ish-presidenti Bujar Nishani ka reaguar për vizitën e prokurorëve belgë në Shqipëri, dhe faktin që morën në pyetje kryedemokratin Lulzim Basha. Për Nishanin, kjo është një njollë e rëndë mbi imazhin dhe dinjitetin e Shqipërisë. Belgët kanë marrë me vete akte nga dosja “Toyota Yaris”, dhe dëshminë e kreut të opozitës, ndërkohë që hetimet në vendin e Bashkimin Europian janë të hapura. Pritet që brenda pak javëve, çështja që po hetohet nga belgët, të shkoj për gjykim në Bruksel. Basha është pyetur në SPAK për dy orë rresht nga prokurorët belgë, ku ka dhënë përgjigje rreth pyetjeve të tyre në lidhje me dosjen e 3.4 milionë eurove të “Toyota Yaris”. Në një prononcim për mediat, pasi doli nga ambientet e SPAK, Basha tha se drejtësia belge është e vendosur t’i shkojë deri në fund kësaj çështje dhe se ai do të ndihmojë në këtë drejtim “duan apo nuk duan “non grata-t” e shpallur dhe të pashpallur deri më tani.
Statusi
Fakti që hetuesit e Institucionit të Akuzës për krime penale të një vendi të Bashkimit Evropian, vijnë e shkojnë, përsëri vijnë e marrin përsëri e përsëri në pyetje mbi një aferë të rëndë mafioze, Lulzim Bashën, më së paku është një njollë e rëndë mbi imazhin dhe dinjitetin e Shqipërisë.
Për fatin e mirë, imazhi i Partisë Demokratike, shpëtoi nga kjo barrë e rëndë që prej momentit kur demokratët e sikterisën prej kurrizit të tyre këtë parazit politik që ju shkatërroi rëndë ëndërrën, që ju shiti sakrificat e ju tradhëtoi shpresat !
Por duke qenë se ende ky person është anëtar i Kuvendit të Shqipërisë, del e flet nga aula e supozuar të jetë më e epërmja e dinjitetit, integritetit dhe imazhit të popullit shqiptar, fakti i rëndë vijon të na turpërojë të gjithëve.
Pavarësisht se cili do të jetë fati penal i Lulzim Bashës me drejtësinë evropiane në vijimësi të kësaj dosje penale, ai kurrsesi nuk duhet të vijojë të kompromentojë e të bëjë pis Kuvendin e Shqipërisë, duke u paraqitur ende si parlamentar i shqiptarëve para hetuesve evropianë për një aferë mafioze e trans-kriminale.
Boll më, hiqu tutje nderit të shqiptarëve!
