Qeveria ka nxjerrë për konsultim publik projektligjin për armëmbajtjen në Shqipëri, ku synon të ulë moshën për lejet e armëve nga 25 në 22 vjeç. Projektligji është nxjerr për konsultim publik dhe sipas relacionit të qeverisë ka për qëllim përafrimin me kuadrin ligjor të Bashkimit Europian.
Ligji i ri parashikon gjithashtu lejimin e armëve të vërtetë për realizimin e filmave dhe videoklipeve, për të cilat duhet të merret një autorizim i posaçëm. Gjithashtu lejohet të pajisen me autorizim për armë të shkurtra të kategorisë “B”, personat që për shkak të detyrës shtetërore ose të rrethanave personale të veçanta janë të ekspozuar ndaj rrezikut për jetën dhe u njihet e drejta e mbrojtjes së veçantë, si dhe personat që plotësojnë kriteret për mbajtjen e armës. Lejet dhe licencat jepen nga Policia e Shtetit. Autorizimet për armë kanë afat 5-vjeçar dhe rishikohen në përfundim të çdo afati.
