Kryeministri Edi Rama bashkë me ministrat është ndaluar në qytetin e Vlorës ku po zhvillon dëgjesën publike me qytetarët lidhur me problematikat e këtij qyteti dhe rrethinave të tij. Duke diskutuar projekt-buxhetin e vitit 2018 kryeministri Rama thkesoi se buxheti do të përqendrohet sipas nevojave të qytetarëve. Ndërsa radhiti një sërë investimesh që pritet të përfshijnë Vlorën dhe rrethinat e saj.
“Duam të zgjerojmë më tutje shërbimet spitalore. Qendrën e Kaninës e kemi shpallur zonë të mbrojtur, do të vazhdojmë projektin e qendrës urbane, kemi një sërë projektesh të tjera. Brenda vitit të ardhshëm do të fillojmë rindërtimin e bulevardit Vlorë-Skelë. Do të vijojmë fazën e dytë të Lungomares në krahun perëndimor, për ta shtrirë deri në pyllin e Sodës. Kemi nisur një projektim të zonës qendrore të portit, pasi duam të çelim rrugën për një port turistik. Do të ishte një nxitje e fuqishme, për ekonominë, punësimin, dhe turizmin në Vlorë”, tha kryeministri Rama. Kreu i Qeverisë shtoi se pritet përfundimi i projektit për aeroportin e Vlorës. Ai tha se brenda këtij 4-vjeçari synohet realizimi i këtij projekti, por theksoi se kjo mbetet në kuadër të dëshirës.
https://www.facebook.com/edirama.al/videos/10155222458886523/
